[wayak]

المكان أحد أحياء القاهرة

الزمان يوم من أيام صيف عام 2052


حفيدة في سن المراهقة (12 سنوات) تجلس مع جدتها (70 سنة) ويدور بينهما هذا الحوار







الحفيدة: تيته ميرو إزيك..بقى لي زمان ما قعدتش معاكي


ا لجدة: وهو أنا عارفة أتلم عليكي خالص.. ده أنا قاعدة زهقانة قوي ومش لاقية حاجة تسليني



الحفيدة: ومابتفتحيش الدش ليه يا تيته



الجدة: التليفزيون بقى ممل خالص مافيهوش غير 9700 محطة بس!.وأنا كمان ما بعرفش أغير المحطات!



الحفيدة: وإيه الحلاوة دي؟ حلو البادي اللي انتي لابساه ده..بس ده موضة قديمة قوي ياتيته !



الجدة : يا بنتي أنا ست دقة قديمة وبالبس زي ما جيلنا الصاعد اتعود وحسب التقاليد القديمة بتاعتنا



الحفيدة : أيوه بس مش حاسة إنك مخنوقة وانتي لابساه؟



الجدة: أبداً ده هو ده اللبس المحتشم اللي مفروض الكل يلبسه ويحافظ عليه..فين أيام زمان لما كنا نلبس ا لبادي اللي مبين البطن والظهر بس، مع البنطلون السترتش الجلد …كانت حاجة آخر روشنة



الحفيدة : ياه يا تيته.. ده انتوا كان ليكم تقاليد غريبة خالص !



الجدة : وهو انتي فاكرة إن أيامكم دي أيام؟ يا بنتي أيامكم دي ما يعلم بيها إلا ربنا .. فين أيام سنة 2002، هي الواحدة فينا كانت تستجري تشرب سيجارة البانجو ولا تسحب لها سطر بودرة قدام أبوها؟ طب ده الدنيا كانت تتقلب ساعتها وما تتعدلش .. أمال إيه .. كان فيه حاجة اسمها أخلاق



الحفيدة: معقول يا تيته؟ للدرجة الفظيعة دي!!؟



الجدة: أمال انتي فاكرة إيه .. وبعدين كانت الست من دول ما تلبسش اللبس الخليع بتاع اليومين دول..يعني الجيبة كان ما يقلش طولها عن شبر وربع .. وكانوا الستات يلبسوا فوقيها بلوزة باستمرار ..مش زي دلوقتي! حسبي الله ونعم الوكيل!



الحفيدة : يا خبر .. وإيه كمان ياتيته



الجدة: ح أقول لك إيه ولا إيه يعني خدي عندك مثلاً .. زمان كنا نسمع الطرب الأصيل لمطربين حقيقيين زي مصطفى قمر وعمرو دياب وطبعاً كانت سيدة الغناء "شاكيرا"، وكانت الأغنية مدتها أكثر من دقيقتين متواصلين من الطرب الأصيل والموسيقى الهادية الراسية اللي تعمر النافوخ بصحيح كانوا مطربين روشين وآخر طحن، حسبي الله ونعم الوكيل!



الحفيدة : وبعدين ياتيته



الجدة : وبعدين كنا نسمع على حاجة اسمها اسطوانات ليزر، ودي صحيح انقرضت، بس كان ليها طعم عن دلوقتي، يا سلام لما كنا نحطها في الووكمان ونعلقها في حزام البنطلون كده ونمشي في الشارع كده، كانت أيام جميلة. حسبي الله ونعم الوكيل!



الحفيدة : حكاويكى ممتعة قوي يا تيته .. ثانية واحدة بس لما أصحي سمسم صاحبي فى المدرسة لأنه بايت معايا في الأودة من امبارح ..أصل الإنسان الآلي بتاع الصحيان بايظ ولازم نصلحه النهاردة



الجدة: طيب يا حبيبتي روحي



(بعد عدة دقائق)



الحفيدة: هيه يا تيته.. وبعدين



الجدة : أحلى أيام بقى كانت أيام الدراسة، الفصل كان على أيامنا رايق وعدد التلاميذ فيه ما يزيدش عن ستين سبعين تلميذة، وكنا ساعتها بنعرف نفهم الدرس كويس مش زي دلوقتي، وكانت الشوارع أيامها فاضية يعني كانت إشارة المرور تقعد ساعة إلا ربع بس لأن مصر كلها كان تعدادها 70 مليون مش أكثر، تخيلي بقى الروقان اللي كنا فيه؟ حسبي الله ونعم الوكيل!



الحفيدة : 70 مليون بس؟!!



الجدة : أمال إيه .. عشان كده كانت كل حاجة رخيصة ، يعني مثلاً كيلو اللحمة يوم ما يضربه الدم كان يبقى بخمسة وعشرين جنيه أو بتلاتين جنيه، وكان أتخن جوز جزمة بـ 250 جنيه، وكان الواحد يقدر يشتري شقة تمليك بـ 150 ألف جنيه بس..وكان الدولار بخمسة جنيه بس تخيلي بقى؟



الحفيدة : ما هو علشان كده الجواز على أيامكم كان سهل خالص، إحنا بقى خلصنا من العُقد دي



الجدة : أُمال إيه .. ده احنا الواحدة مننا كانت بمجرد ما توصل سن 17 سنة تبتدي تفكر في الجواز العرفى على طول، وما كانش عندنا الأفكار الغريبة اللي بتعملوها دلوقتي، أنا شخصياً شايفة إن ده أوفر شوية، ده احنا يا بنتي على أيامنا كان لا يمكن البنت تتأخر بره البيت عن الساعة أربعة صباحاً، طب ده باباها كان ممكن ساعتها يخاصمها !



الحفيدة : ياي! ده انتوا كنتوا متزمتين خالص ياتيته !!!



الجدة : يا بنتي إحنا اتربينا على الأخلاق والفضيلة والعادات والتقاليد . يعنى كان أهل الفن محتشمين جداً وكانوا دايماً يطلعوا بالمايوهات البيكيني، والمذيعات كانوا يقعدوا جنب الضيف مش على ركبته زي دلوقتي.. هيـ يـ يـ يـ ـه الله يرحم دي أيام.. فكرتيني بالذي مضى حبي الله ونعم الوكيل!



)تمسك الجدة بتليفون محمول في حجم علبة الكبريت)



الحفيدة : ح تكلمي مين يا تيته



الجدة : الحقيقة أنا كنت موصية الجزار على اتنين كيلو لحمة و اديته 600 دولار عربون وعايزة أطلبه أشوف إذا كانت اللحمة وصلت ولا لأ ..



الحفيدة: (تنهض من مكانها) تشاو سي يو تيته!



الجدة: سي يو



وبعد مرور عدة ساعات انتابت الجدة خلالها غيبوبة بسبب الشيخوخة

و في المساء دار هذا الحوار بين الجدة والحفيدة:

الجدة: إنتي كنتي فين يا فتفت؟



الحفيدة :أصل إحنا أخدنا الولد من الحضانة ..



الجدة : ولد !! ولد إيه اللي أخدتوه من الحضانة؟



الحفيدة : آه صحيح أنا نسيت أقول لك .. أصل أنا جبت ولد من سمسم صاحبي



الجدة: يا بنتي مستعجلين على إيه مش لما تتجوزوا ؟ حسبي الله ونعم الوكيل!



الحفيدة : يا سلام عليكي يا تيته.. إنتي عليك تحكيمات غريبة..طيب إيه اللي يمنع نخلف من غير جواز أنا شخصياً عملتها ونفعت



الجدة : مشكلتي إني ما باعرفش أزعل منك يا فتفت يا عكروتة ..وسميتوا المحروس إيه بقى



الحفيدة : سميناه (دوت كوم) ..



الجدة : نعم .. دوت كوم؟ نظام هاي تك بقى؟ يعني لما تعوزي تنادي له تدوسي (إنتر) ولا إيه بالضبط ؟



الحفيدة : ها ها ها ها .. إيه الخفة دي يا تيته .. والله فكرة .. لما أعوز أنده له أدوس إنتر .. ولما أحب أقول له روح أودتك أدوس (ألت و إف4)



الجدة: وأخدتوه من الحضانة وديتوه فين بقى؟



الحفيدة : وديناه النادي الصهيوني بتاع الحي


الجدة : النادي الصهيوني بتاع الحي؟



الحفيدة : أيوه .. ده نادي جميل معمول برعاية كبار رجال الأعمال .. وتحت رعاية وزارة الزراعة وده بيعلم الأطفال حاجات ظريفة خالص ومصاريفه رخيصة جداً وبعدين الولد الكويس ممكن يبعتوه يكمل تعليمه في إسرائيل على نفقة وزارة الزراعة أصل (ميدو يوسف والي) وزير الزراعة ده راجل متفتح قوي. هه، أفتح لك التليفزيون يا تيته عشان تشوفي نشرة الأخبار



الحفيدة تضغط الريموت كنترول لنرى شاشة كبيرة بطول وعرض حائط الغرفة، وتظهر صوت مذيعة مصحوبا بلقطات للأنباء تقول:



المذيعة : هاي شلة! إليكم عناوين الأخبار



أخبار عالمية



- أمريكا ترصد 25 مليار دولار لرأس تامر بن محمد بن أسامة بن لادن المتهم الأول في تفجير قصر السفير الأمريكي في أفغانستان



- واشنطن تتهم ليبيا بتفجير سفينة فضاء فوق كوكب المريخ



- وزير الاقتصاد د. فريد يوسف بطرس غالي يصرح: إعدام الفقراء هو الحل لخروجنا من عنق الزجاجة



موافقة مجلس الشعب أخيرا على خصخصة معبد الكرنك



أخبار عربية:



- زهوة ياسر عرفات تطالب بانسحاب إسرائيل حتى حدود عام 2030، وإعلان الدولة الفلسطينية في مايو المقبل



- سيريلانكا والفلبين تطرد خمسة آلاف خادمة كويتية



- إسرائيل ترفض الإنسحاب من البصرة إلا بعد ضمان أمن مستوطناتها في بغداد



- اشتباكات على الحدود الإسرائيلية المغربية



أخبار الفن


- زفاف المطربة صباح على حفيد الفنان الراحل راغب علامة



- رئيس قطاع الإنتاج لم يستقر بعد على بطلة فوازير رمضان ويعقد إجتماع مع السيدة توتي محمد صفوت الشريف وزيرة الإعلام لمناقشة هذه القضية



- الفنان محمد هنيدي يهاجم نجوم الكوميديا الجدد



المذيعة: فينيش باي

الجدة: لأ بقى حسبي الله ونعم الوكيل فيكم فعلا! (يغمى عليها)

الحفيدة : تيته..تيته!!


السؤال هنا

هل سيصبح هذا الزمن كما موجود فى الحكاية؟
وهل سوف تنتشر الحريه الى هذا الحد من عدم الاخلاق ولا مسؤولية

هذا الموضوع مقتبس من احدى المنتديات

[رؤى]

مع ان الموضوع لا يعدو كونه طرفه، الا انه جعلني افكر كثيرا .. وأطرح السؤال تلو السؤال ..
يا ترى .. ما الذي دفع كاتب الموضوع ان يتصور المستقبل بهذه الصورة القاتمة؟
ما مدى تقلبنا للفكرة .. فكرة هذا المستقبل بهذه الشكل وبهذه المفاهيم؟
ما الذي فعلنا حتى يكون مستقبلنا هكذا؟
ام أن السؤال الذي يجب أن يطرح هو .. ما الذي لم نفعله حتى يكون مستقبلنا كما يصور هذا المشهد المرعب !!!

عذرا عن انحرافي عن الموضوع
ولكن .. كم من طرفة أوقدت فكرة !!!

[wayak]

اكيد الموضوع يجعلنى ان نفكر فى المستقبل

ونحاول وجود حلول الى تلك التغيرات الكبيرة

وهل فعلا سوف نتغير بهذا الشكل الفظيع

[أحمد ابوالعلا]

عندما يصل الانسان لدرجة اليأس و تضيق به الظروف و لا يجد مفر من متطلبات الحياة و لا امل فى التجديد فيكتب مثلما كتب صاحب القصة الخيالية و لاكن ليته يرى توقيع الاخت رؤى ( كن مع الله و لا تبالى )

[alprince]

اولا لا ادرى ما اسميها فهى ليست قصه المهم انى طلعت ببعض اشياء فليعذرنى كاتبها فما اقوله وجهة نظر خاصه بى
1/ اولا اغيثونا يا اهل العلم هل يعقل ان يكون عندنا 9700قناة ارضيه واحنا اللى لجئنا الى النايل سات لا ن لم يعد عندنا مجال لاى ترددات اخرى ومع ذالك تيته زعلانه ان معندهاش الا 9700قناة فقط تصدقو ان اليوم عندنا فيه 1440 دقيقة فقط الظاهر ان اليوم فى سنة 2052 هيكون اكبر من كده بكتير الظاهر انه هيزيد مع سعر الدولار
2
/ البادى اللى مبين البطن والظهر اصبح موضه قديمه قولولى هو فيه ايه فى الجسم تانى علشان يبان سنة 2052
تخيلات كتيرة انا كنت ناوى ارد عليها بس انا خايف اكون هزعل اخى الكاتب منى ولكن انا هرد بمقالات اخرى فى مواضيع جديده والى كاتب هذا الكلام اهديه كلمات جميله اثرت فيى كثيرا الكلمات بتقول
فليضئى كل واحدا منا شمعة بدلا من ان نلعن الظلام :xlve:

[wayak]

اخى العزيز كما قال اخى احمد ابوالعلا فهو تصور الكاتب القصة فى هذه الحاله

عندما يصل الانسان لدرجة اليأس و تضيق به الظروف و لا يجد مفر من متطلبات الحياة و لا امل فى التجديد فيكتب مثلما كتب صاحب القصة الخيالية و لاكن ليته يرى توقيع الاخت رؤى ( كن مع الله و لا تبالى )

[رحال حول العالم]

المكان نفس الحى بالقاهرة

الزمان يوم من أيام صيف عام 2052


حفيدة في سن الشباب (20سنة) تجلس مع جدتها (70 سنة) ويدور بينهما هذا الحوار







الحفيدة: جدتى .... السلام عليكم و رحمة الله و بركاته


ا لجدة: و عليكم السلام و رحمة الله و بركاته ....... كيف حال حفيدتنا الغالية ... ادعو المولى تبارك و تعالى ان تكونى بخير




الحفيدة: يبدو انك كنت مشغولة بشئ ما يا جدتى الحبيبة



الجدة: نعم يا ابنتى كنت اعد الكلمة التى كنت سألقيها فى الاحتفال هذا العام فى بمرور 5 اعوام على تحرير القدس


الحفيدة: ادعوا المولى تعالى ان يمن علينا بفتح روما عما قريب



الجدة : آمين .... اللهم انصر المجاهدين و تقبل الشهداء



الحفيدة : جدتى لدى مشكلة اعانى منها .... تتعلق بارتدائى للخمار ..... فالكثيرات من صديقاتى يخبرونى انى يجب ان اتحول الى النقاب .... انا مترددة جداً .... خصوصاً و انى لم يتم خطبتى بعد



الجدة: أبداً ده هو ده اللبس المحتشم اللي مفروض الكل يلبسه ويحافظ عليه..هنعمل زى أيام زمان لما كنا نلبس الالوان و المزركش عشان نجذب الانتباه و نحظى بالعرسان


الحفيدة : ياه يا تيته.. ده انتوا كان ليكم تقاليد غريبة خالص !



الجدة : وهو انتي فاكرة إن أيامنا دي كانت حلوة ؟ يا بنتي أيامكم دي ربنا يبارك لكم فيها .. مش زى أيام سنة 2007، هي الواحدة فينا كانت تحاول تلبس الخمار مش النقاب و نلاقى الهجوم الشرس و الدنيا تتقلب ساعتها وما تتعدلش .. أمال إيه .. كان فيه حملة صارخة على التدين و المتدينين



الحفيدة: معقول يا تيته؟ للدرجة الفظيعة دي!!؟



الجدة: أمال انتي فاكرة إيه .. وبعدين كانت الست من دول ما تعرفش تلبس اللبس الرائع بتاع اليومين دول..تحس ان الكل ينظر لها نظرات استنكار ..مش زي دلوقتي! حسبي الله ونعم الوكيل!



الحفيدة : يا خبر .. وإيه كمان ياتيته



الجدة: ح أقول لك إيه ولا إيه يعني خدي عندك مثلاً .. زمان كان بيقولوا انه فيه حاجة اسمها فن الطرب الأصيل لمطربين زي مصطفى قمر وعمرو دياب وطبعاً كانت مصيبة الغـــــباء "شاكيرا"، وكانت الأغنية مدتها لا تزيد عن دقيقتين متواصلين من الغناء الذى لا يحمل اى معنى والموسيقى الصاخبة اللي تفلق النافوخ بصراحة ، حسبي الله ونعم الوكيل!



الحفيدة : وبعدين ياتيته



الجدة : وبعدين كنا نسمع على حاجة اسمها اسطوانات ليزر، ودي صحيح انقرضت، بس كان ليها طعم عن دلوقتي، يا سلام لما كنا نسجل عليها القرآن الكريم و نستمتع بالصوت النقى ... على ايامنا كان هو ده انقى صوت ممكن نحصل عليه ، كانت أيام ........ حسبي الله ونعم الوكيل!



الحفيدة : كلامك ممتع جداً يا جدتى .. ثانية واحدة بس لما أتصل بصديقتى هدى .. المخترعة العبقرية ..أصل الإنسان الآلي الذى صممته فيه عطل ومحتاجين نراجع التصميم من الاول .


الجدة: طيب يا حبيبتي روحي



(بعد عدة دقائق)



الحفيدة: السلام عليكم جدتى .... عدت اليك مرة اخرى. هل نكمل ما بدأناه



الجدة : أصعب أيام ... كانت أيام الدراسة، الفصل كان على أيامنا مزدحم جداً ...عدد التلاميذ فيه لا يقل عن ستين سبعين تلميذة، وكنا ساعتها بنحفظ الدرس كويس ... لاننا كنا لا نجد مدرسين فاهمين اصلاً و كمان الامتحانات لا تعالج الفهم مطلقاً ... و كان شعار الامتحانات ... احفظ تنجح و تجيب مجموع .... لو حاولت تفهم يبقى مش هتنجح فى سنينك ...... مش زي دلوقتي، وكانت الشوارع أيامها لا تسمح بالسير على الاقدام يعني كانت إشارة المرور تقعد ساعة إلا ربع او ساعة و ربع لأن مصر كان تعدادها 70 مليون متمركزين فى القاهرة ، تخيلي بقى ازهقان اللي كنا فيه؟ حسبي الله ونعم الوكيل!



الحفيدة : 70 مليون داخل القاهرة !! امال المنطقة الغربية و ملايين المصانع دى مين كان بيشتغل فيها ؟؟؟؟



الجدة : أمال إيه .. عشان كده كانت كل حاجة غالية ، يعني مثلاً كيلو اللحمة تسعيرته بخمسة وعشرين جنيه أو بتلاتين جنيه، و يباع فعلياً ب 45 جنيه و اللى مش عاجبه يأكل فول وكان الواحد لا يقدر يشتري شقة تمليك بـ 150 ألف جنيه لان مرتبه كان 300 جنيه و بالتالى اذا اشتغل طول عمره مش هيعرف يحصل على غرفة فقط و ليس شقة ..وكان الدولار ب6.75 جنيه تخيلي بقى؟



الحفيدة : ما هو علشان كده الجواز على أيامكم شبه مستحيل ، إحنا بقى الحمد لله مشاكل الزواج عندنا اختلفت كتييير عن ايامكم



الجدة : أُمال إيه .. ده احنا الواحدة مننا كانت بمجرد ما توصل سن 30 سنة تبتدي يتقدم لها عريس عنده 40 سنة .. طبعاً كانت مضطرة تقبل لانها مش هتلاقى عريس جاهز اصغر سناً من هذا .... هو ده المتاح ، وما كانش عندنا الأفكار الغريبة اللي بتعملوها دلوقتي، أنا شخصياً شايفة إن ده أفضل كتييير ، ده احنا يا بنتي على أيامنا كان لا يمكن اهل البنت يقبلوا يجوزا بنتهم فى بيت اهل زوجها و يطلبوا شقة بعيدة عن العائلة تجنباً للمشاكل .... حاجة اخر استهبال بصراحة



الحفيدة : ياي! ده انتوا كنتوا حياتكم صعبة جداً !!!



الجدة : يا بنتي إحنا اتربينا على عدم القناعة بالقليل و النظر لما فى يد الاخرين . مش زي دلوقتي.. هيـ يـ يـ يـ ـه الله يرحم دي أيام.. فكرتيني بالذي مضى حسبي الله ونعم الوكيل!



)تمسك الجدة بتليفون محمول في حجم علبة الكبريت)



الحفيدة : ح تكلمي مين يا جدتى



الجدة : الحقيقة أنا كنت موصية الجزار على اتنين كيلو لحمة و اعطيته 3 جنيهات عربون وعايزة أطلبه أشوف إذا كانت اللحمة وصلت ولا لأ ..



الحفيدة: ( قبل تنهض من مكانها ) هل تسمحى لى بالمغادرة يا جدتى ؟؟؟؟!



الجدة: تفضلى يا حبيبتى



وبعد مرور عدة ساعات قضتها الجدة فى المؤتمر الذى تحدثت فيه عن اسباب النصر و البطولات التى تمت فى فتح القدس

و في المساء دار هذا الحوار بين الجدة والحفيدة:

الجدة: هل تابعت احداث المؤتمر ؟



الحفيدة :نعم تابعت البث المباشر .... كان احتفالاً رائعاً ..



الجدة : لقد تحدثت الى جارتنا ام عبد الرحمن اثناء عودتى من المؤتمر و تطلب يدك الى ابنها ...... ما رأيك ؟



الحفيدة :من هو عبد الرحمن ؟


الجدة: مهندس ..... و هو الان فى البوسنة يقوم بتدريس العلوم الهندسية و ينقل احدث العلوم التى توصلنا لها الى شعوب اوروبا للرقى باحوالهم



الحفيدة :اممممم ناخد رأى ابى و امى ... و اصلى الاستخارة و ربنا يقدر الخير



الجدة : ربنا يصلح لك الاحوال و تنجبوا ذرية صالحة و يجعلكم من اهل الجنة .......



الحفيدة :كده يبقى موضوع ارتداء النقاب لا رجعة فيه و لا يوجد داعى للتأخر فى ارتداؤه



الجدة : نعم ..... ارأيت ان موضوع الخمار و النقاب لم تكن له علاقة بالزواج و ان جارتنا هى التى رشحتك لابنها بسبب اخلاقك و تدينك و حتى هو لم يرك بعد و سيعود لمصر بعد اسبوعين ... ربنا يوفقك يا بنتى
صحيح لما ربنا ينعم عليك بالذرية الصالحة ما اسم اول مولود ان شاء الله ؟



الحفيدة : إذا كانت بنت انا ناويه اسميها هدى او تقى او ايمان و ان كانت ولداً فليكن عبد الله او عبد الرحمن ..... فخير الاسماء ما عبد و ما حمد



الجدة: ويا ترى تتمنى يدرسوا ايه ؟



الحفيدة :إن شاء الله سأجعلهم يدرسوا علوم القرآن


الجدة : علوم القرآن ؟



الحفيدة :اى نعم .... ارغب ان يكون ابنائى حملة لكتاب الله تعالى و دعاة عظام يجوبون العالم بما يفيض الله تعالى عليهم به من علم



الحفيدة : و طبعاً العلوم العامة كالهندسة و الطب و الكيمياء ستكون حسب رغباتهم هما اللى يختاروها و كمان دراستها سهلة جداً و جامعاتنا و اساتذتنا على اعلى المستويات ..... يعنى بأمر الله يحصلوا على درجاتهم العليا من ماجيستير و دكتوراة على سن الــ 20 و بعدها ينطلقوا ليجوبوا العالم بعلمهم .




الجدة : ما رأيك لو نتابع اخبار العالم ؟



المذيع : السلام عليكم و رحمة الله و بركاته . عناوين الأخبار

أخبار عالمية

- القاهرة تتنافس مع طرابلس فى عمل ابحاث غاية فى الدقة على سطح كوكب المريخ




- الخرطوم ترسل مساعدات طبية و غذائية عاجلة الى المنكوبين فى احداث الاعصار المدمر الذى يضرب شرق سواحل ما كان يعرف بالولايات المتحدة سابقاً .



- وزير الاقتصاد : عبد الله أحمد المصرى يدرس طرق اغاثة الفقراء فى الصين


موافقة مجلس الشعب أخيرا على منح شعوب دول اوروبا الشرقية حق اللجؤ السياسى لحمايتهم من بطش و ارهاب الصهاينة .

أخبار عربية

- الاحتفال باختيار اللغة العربية اللغة الاولى من حيث عدد الناطقين على مستوى العالم



- روسيا تطالب بالانضمام الى الاتحاد العالمى لدارسى اللغة العربية الغير ناطقين بها و الذى يقام المؤتمر السنوى له فى بغداد اعتباراً من اليوم و يستمر لمدة يومين أخرين



- فلسطين تعلن عن تزايد غير مسبوق فى اعداد الرحلات السياحية الى القدس و تعرب عن املها فى تطوير مداخل و مخارج المدينة حتى توفر افضل وسائل لزيارة المسجد الاقصى المبارك



- فتح المرور بدون تصاريح لكل من يحمل بطاقات تحقيق شخصية عربية بين جميع الدول العربية

أخبار الفن

- صدور العدد الــ 8 من ألبوم الرحلة الى الاقصى للمطرب العالمى محمود عياش



- رئيس قطاع الإنتاج لم يستقر بعد على اماكن تصوير الفيلم الوثائقى العروبة و الاسلام



- الفنان محمد الساجد يعلن عن مشاركته فى الاحتفال السنوى باعياد النصر و يتبرع بدخله فى الاحتفال لصالح الايتام فى امريكا اللاتينية



المذيع: الى هنا تنهى عناوين الاخبار و السلام عليكم و رحمة الله و بركاته



الجدة: هيا يا ابنتى نخلد الى النوم قليلاً لنتمكن من الاستيقاظ لصلاة القيام



الحفيدة : نعم يا جدتى ... اعتمدى على فى ايقاظك فاسأسهر انا لقرأة القرآن و دراسة تفسير سورة الاسراء

هنا تنتهى الامانى و ادعوا المولى تبارك و تعالى ان نحققها يوماً ما او يحققها الاجيال القادمة

هذا الرد غير مقتبس

[mem222]

تشائم
- إسرائيل ترفض الإنسحاب من البصرة إلا بعد ضمان أمن مستوطناتها في بغداد
- اشتباكات على الحدود الإسرائيلية المغربية

تفائل
- فلسطين تعلن عن تزايد غير مسبوق فى اعداد الرحلات السياحية الى القدس و تعرب عن املها فى تطوير مداخل و مخارج المدينة حتى توفر افضل وسائل لزيارة المسجد الاقصى المبارك

ففي أي طريق نحن سائرون ؟؟



مقتطفات من قول الرسول صلى الله عليه وسلم (فيما معناها)
- فطوبى للغرباء
- القابض على دينه كالقابض على الجمر
- تكثر فيه الفتن والهرج(القتل) وترفع الأمانة
- ينزع العلم ويرفع القرآن من صدور الرجال


_ ينزل عيسى عليه السلام فيقتل الدجال ويكسر الصليب ويحكم بالشرع
_ يأكل المجموعة من حبة عنب والرمانة تكفي النفر الكثير وتخرج الأرض كنوزها
_ تعود جزيرة العرب مروجا وأنهارا
_ يخرج المؤمن بصدقته ملئ كفه ذهبا فلا يجد من يأخذها
_ تقاتلون اليهود فيقول الشجر والحجر يا مؤمن يا عبد الله هذا يهودي خلفي فتعال فأقتله الا شجر الغرقد

ورب الكعبة كلها ستكون في مراحل آخر الزمان
فهل نحن في أوله


شكرا لكم