[grand]

المشكله باختصار ان الزبون كلمنى وقالى الثلاجه مش بتجمد المنتجات فى الفريزر بصيت على الثلاجه من اسبوعين فلقيت الكويل مش مشمع ثلج عليه غير ملفين من الكويل فقط والباقى مش مشمع خالص وعليه مياه قولت اشغل السخان بتاع الثلاجه وبالمره اطمن على دائره التسخين لفيت التايمر على وضع التسخين السخان اشتغل الى ان تم تسيح الثلج خالص يعنى كده دائره السخان والصرف سليمه
شغلت الماتور وسبت الثلاجه من الظهر الى بعد العشاء وبصيت على الكويل لقيته نفس الموضوع ملفين مجمدين بس فقولت للزبون كده احتمال يكون اما تسريب او ان الماتور ضعف كبسه والاغلبيه فى الماتور ضعف لان الشبكه بتاع التوشيبا داخليه وبتكون نحاس فصعب انها تسرب
المهم قالى شويه كده وهتصل بيك علشان تجبلى ماتور بعد اسبوعين كلمنى علشان اجيب الماتو كل ده والثلاجه شغاله مفصلهاش روحت علشان اشوف الثلاجه بعد اسبوعين لقيت الفريزر كله ثلج جامد بدايته ونهايته والكويل مثلج كله قولت الحمد لله كده الماتور احتمال سليم اشوف دائره السخان لفيت التايمر على وضع التسخين السخان مسخنش عملت اختبار على الثيرموديسك لقيته فاصل وشوفت السخان لقيته بايظ المهم غيرت السخان والثيرموديسك والتايمر ومشيت لقيت الزبون بيتصل بيا ثانى يوم بيقولى الحاجه برضوا مجمديتش روحت لقيت الكويل عليه ثلج بس ثلج عادى مش جامد قوى فلفيت التايمر على التسخين فسخن وسيح الثلج بس فى مشكله ان التايمر لما جبته على التسخين مشغلش الماتور غير بعد ساعه ونصف
هل مشكله عدم التحميد فى دايره التسخين ولا فى الماتور ولا فى التيرموستات اؤجوا الرد بالله عليكم بقالى 3 ايام بروح للزبون بيته لما مليت

[myussef]

حكايتك غريبة بس اللي اقدر انفعك بيه هو انك تحط التايمر على وضع الاذابة وتشغل الثلاجة ولو ذوبت الثلج ثم انتقلت لوضع التبريد فنظام التايمر بيكون كويس والاذابة كويسة.

لو لقيت نظام الاذابة والتايمر كويس شغل الثلاجة وافصل المروحة الداخلية.... بعدها بعشر دقائق او اقل تلاقي المبخر من اوله لآخره ثلج خفيف معناها التبريد كويس .
هذا فحص سريع للثلاجة النوفروست.

[عمروعمرو]

بعد ما تتأكد من دورة التبريد و دايرة التايمر ممكن نشوف الترموستات تعمل عليه شورت و لو المشكلة اتحلت غيره، لأن لو التايمر نظام ١٥ دقيقة او ٢٠ دقيقة او عموما زمن محدد مش تسيح كامل ممكن يكون الترموستات بيعلق، يخلي الكويل دافي ما يجمدش الحاجة في الفريزر او عليه تلج كتير و التايمر ما يلحقش يسيحه و تأخير الماتور في الدوران لمدة ساعة و نص ممكن يكون برضه لنفس السبب.

[grand]

شكرا على اهتمام اعضاء المنتدى بحل المشكله
المهم المشكله اتحلت بالاتى
1- مشكله التايمر اللى كنت بلفه على وضع التسخين وبيفضل على وضع التسخين حوالى ساعه ونصف المشكله دى بعد تجارب عنيفه توصلت ان اى تايمر لو اتلف بالايد وجه على وضع التسخين هيغيب فى مده التسخين وهيفضل المده دى كلها انما لو سبته ينقل من التبريد للتسخين توماتيكى فهيفضل يسيح الثلج وبعد كده هتكون فتره التايمر زى مالكتاب بيقول والتايمر التوشيبا فتره الانتظار بتكون 3 دقايق يعنى سيح الثلح وفصل السخان وفضل 3 دقايق ونقل على التبريد مش ساعه ونصف زى مالفيته بايدى
2- مشكله عدم تبريد المنتجات فتوصلت ان الثلاجه محتاجه شحن مش علشان فى تنفيس بالعكس مكنش فى تسريب ولا حاجه نظفت الدايره وغيرت الفلتر وشحنت بصراحه وقفت المروحه الكويل شمع كله فى اقل من عشر دقايق والثلاجه جمدت المنتجات والزبون فضل يدعيلى اصل الثلاجه دى دخل عليها مليون فنى ومعرفش المشكله بس الحمد لله

[عمروعمرو]

تقريبا العيب كان سدد موقت يعني وساخة في دورة التبريد ممكن بعد شوية تتحرك عشان كده المشكلة بتروح و ترجع تاني، اما السخان اتحرق صدفة عشان يحيرك زيادة، المهم حمدالله بالسلامة

[myussef]

ما انت بردو بمليون فني اللهم بارك

[عمروعمرو]

فعلا العيب صعب و مداري.