 |
|
| قسم أجهزة الانتاج الزراعي والحيواني تصميم وصيانة وسائل الانتاج النباتي والحيواني من حاضنات واجهزة تعقيم وتخزين وتوليد الطاقة البديلة |
| أدوات الموضوع |
|
||||||
|
منشور للمهندس عاطف عبد الدايم دى تجميعة لكل البوستات اللى اتكلمت عن كيس المح نرجو الدعاء بظهر الغيب البوستات دى فى غاية الاهمية لمعرفة سلوك الطير فى اول اسبوع واهمية كيس المح وامتى يكون فية ضرر منة استوعبها جيدا هتفيدك كتير وهى تعتبر اول درجة لعمل كتكوت وطير مناعتة ووزنة جيد ----------------- نظرة حقلية علمية على كيس المح هو كيس لونة اصفر او اصفر مخضر وعبارة عن كيس فية المح واوعية دموية حولية هى المسؤلة انها تاخد بروتينة او فيتامينة الى الدم او الكبد وبعدين تتوجة الى المنطقة المخصصة لها فى الجسم المفروض ان حجمة يتانسب تناسب عكسى مع العمر يعنى كل ما تقدم الكتكوت فى العمر كلما قل حجم الكيس دا والعمر هنا مش بالايام لا بالساعات طيب الشغل العلمى والعملى بيقول انة بيمتص خلال 3 ايام و6 ساعات يعنى 78 ساعة لو دا حصل يبقى شغلك كلة تمام هنقول كلام علمى ونقول نستفيد منة اية فى الواقع **يعنى مثلا تركيب محتوى كيس المح 3 حاجات اساسية هى البروتين واحماض دهنية وفيتمينات واحسام مضادة جاية من الام طيب نطلع من المعلومة دى باية ان الكيس ناقص فى الكربوهيدرات طيب اية المكون الاساسى فى العلف المسؤال عن الكربوهيدات طبعا الذرة علشان كدا الاستقبال على الذرة زى ما قلت قبل كدا هام علشان تكلمة كل اللى محتاجة الكتكوت فى العمر دا ** حاجة تانية كمان ان اول عضو بيستقبل مكونات كيس المح هو الكبد وعلشان كدا بنلاقية مايل الى الصفار فى العمر دا لية علشان المحتوى العالى من الاحماض الدهنية اللى جايالة من الكيس يعنى كل ما كان اداء امتصاص كيس المح سليم كل ما كان اصفر الكبد ** حاجة خطيرة جدا وهى ان 20% وزن الكتكوت فى الايام الاولى بياخدها من كيس المح والباقى من العلف دا بس علشان نعرف اهمية الكيس دا وما فية من خيرات للكتكوت ** طيب حاجة هامة جدا وهى ان الكتكوت متعود طول ما هو فى البيضة على انة ياخد اكلة من الكيس دا علشان كدا المعدة مش شغالة ولا الفلور المعوية ودى بنحتاجها اكثر علشام هضم الكربوهيدرات لان باقى العناصر الغذائية موجودة فى الكيس بصورة سهلة الهضم والامتصاص طيب نطلع من دى باية ان بداية اكل الكتكوت على اول مصدر كربوهيدرات هو اللى بيخلى الكتكوت يتحول من اعتمادة الكلى على الكيس الى بداية اعتمادة على الامعاء والفلورا المعوية علشان كدا المسافة الزمنية بين الفقس وبين استهلاك اول علف لها دور كبير جدا فى ان الطير دا هيعمل وزن كويس ولا لا ودا اللى بيخلينا نقول لو الكتكوت جاى من مسافة كبيرة عجل من التعليف طيب كمان معلومة خطيرة جدا اى جسم عاوز بروتين ودهون وفيتمينات وكربوهيدرات علشان ينمو طيب الكيس فية كل حاجة ماعدا الكبروهيدرات يعنى لو اتاخر علية العلف او اى مصدر كربوهيدراتى لاكثر من 24 ساعة هتكون مشلة فى الوزن مستقبلا لانة كدا كدا بيستهلك من كيس المح بس بيستهلك مواد غذائية ناقصة وبالتالى بيقل حجم كيس المح قبل نزول العلف وبالتالى بيقل الوزن النهائى علشان اكتمال تكوني خلايا الامعاء الداخلية والفورا المعوية الشرح دا علشان نوضح امتى ااخر نزول العلف وامتى ابكر بية ولية هحط ذرة بس طيب لو علفت علف على طول مش هيحصل حاجة ضارة لاكن هيتاخر امتصاص كيس المح عن المدة المقررة لة (78 ساعة) لانة بياخد البروتين وغيرة من مصدرين (العلف والكيس) طيب هنا مفيش مشكلة الا فى حالة واحدة بس هو تلوث بكتيرى باى مسبب مرضى زى الكولاى او السالمونيللا وهنا بيجى التهاب كيس المح طبعا مع خلل حرارة التحضين بصراحة كلام من الاخر اللهم اجعل عملنا هذا خالص لوجهك الكريم مع تحياتى وشكرا اخوكم المهندس عاطف عبد الدايم -------------------------------------------------------- تكملة لسلسة الكتابة عن كيس المح اتكلمنا عنة كتير لاكن المرة دى عاوزين نعرف هو بيتكون ازاى يعنى كلام علمى بس فى الاخر هنقول كلام حقلى البيضة بتتفرخ فى الماكينة وطرفها العريض اللى فية الغرفة الهوائية لاعلى والجنين فى المنطقة دى بيحيطة طبقة خارجية متمثلة فى البياض وطبقة وسطى متمثلة فى جدار كيس الصفار وطبقة داخلية متمثلة فى الصفار نفسة كيس الصفار دا بينشا عنة الدورة الدموية اللى بيحصل عن طريقها الاكل والتنفس ومن خلال كيس الصفار بيتكون الامعاء ويبدا الجنين يستهلك البياض لغاية لما يخلص ثم يبدا فى استهلاك الصفار لاكن بيتبقى جزء من الصفار دا غير ممتص او صعب الامتصاص بيكون خارج عن الامعاء والسبب فى عدم امتصاص الجزء دا هو انة اكبر من جحم وقدرة الكتكوت انة يستهلكة الجنين لما بيجى ياكل من الصفار بياخد الكربوهيدات بتاعتة بالكامل لانةواخد بروتين كتير من البياض لان معروف ان البياض معظمة بروتين وبياخد جزء من بروتين الصفار وبعض الدهون وعلى ما يجى ياخد باقى الدهون والبروتين وخاصة البروتينات المناعية المنقولة من الام يكون مرحلة التكوين انتهت وبيكون فية جزء معلق فى الامعاء بيحتوى على خيرات الام صعب دخولة مرة واحدة داخل جدار الامعاء وبالتالى بيكون هدية من الخالق عز وجل للكائن دا علشان لو ملقاش اى غذاء فى الفترة الاولى من حياتة يكون غذاء احتياطى لام مفيش ام هتحتضن او ترضع زى الثدييات لاكن احنا كمربين عاوزين نستغل الكيس دا وندخلة بسرعة من جدار الامعاء الى التجويف المعوى علشان نستفيد من كل اللى فية فبيقولك ان فية حاجات فسيولوجية وميتابوليزمية لها دور هام فى امتصاص كيس المح ودا عرفها اثناء التغذية على الصفار يعنى وجد اهمية بالغة لبعض الفيتمينات فى امتصاص كيس المح ودى هنقولها فى الاخر ووجدوا اى اى اجهاد فى المفرخة سواء تهوية او حرارة او رطوبة او تقليب بيقلل من سرعة تجاوب او امتصاص اجزاء من محتويات الصفار ودى نستفيد منها فى المزرعة ان اى اجهاد فى فترة التحصين بياخر من امتصاص كيس المح اجهاد زى برد كتمة حرارة عالية سوء تغذية تعطيش جوع امراض طيب فية نافق طبيعى مسموح بية وبيكون سببة كيس عدم امتصاص كيس المح لاكن بالحث وجد ان للفيتامين دور فى عدم الامتصاص دا يعنى نقص فيتامين أ بيعمل نفوق على عمر 2 و3 يام ونقص فيتامين هـ بيعمل نافق اول 3 ايام نقص البيوتين بيعمل نافق على طوال الاسبوع الاول وعلى عمر 19 و20 و 21 يوم يعنى بتتبع اهمية الفيتمنات دى لحياة الجنين اثناء التكوين وجد ان ال3 فيتمينات دول نقصهم بيعمل عمدم امتصاص كيس المح وبالتالى بيضعف المناعة فى اول العمر يعنى لو مش واثق من تركيبة علفة او شاكك فيها لازم يكون من ضمن برنامج استقبالك الفيتامينات دى اللهم اجعل عملنا هذا خالص لزجهك الكريم مع تحياتى وشكرا مهندس عاطف عبد الدايم ----------------------------------------------------------------------- شوفو يا جماعة الكلام كتير حول ااكل اول ما الكتكوت يوصل ولا اصوم علشان كيس المح وكل واحد براى واحنا نزلنا قبل كد اكثر من بوست عن كيس المح وطريقة التعامل معاة وتركيبة واية اللى بيفيدة واية اللى بيضرة طيب البوست دا هيكون مختلف تمام والكل هيفهم يعمل اية مع الكتكوت اولما يجى بس خلينا نقول الاول ملحوظة صغيرة ان اهم 3 امور فى اول حياة الكتكوت اللى لو نجح هتكون الدورة كويسة والعكس صحيح لو ال3 امور فشلو هم == الزيادة فى وزن الجسم ==وكمية الحجم الممتص من كيس المح علشان نستفيد من المناعة اللى جاية من الام بسرعة ==ووزن وطول الامعاء علشان هى اللى هيحصل فيها الهضم يعنى نحاج ال3 اشياء دول بيعمل افضل وزن على عمر 7 ايام اللى هو اهم مؤشر لنحاج الدورة طيب اتعمل مقارنة بين كتاكيت اكلت وكتاكيت اتصومت وتاثيرهم على ال3 اشياء دى تعالو نشوف اية اللى حصل ركزو معايا جبنا الكتكوت وزنة فى المعمل 45.2 جرام وزن كيس المح 7.25 جرام وزن الامعاء وما بها من خملات هضمية 1.2 جم نفس الدفعة دى قسمناها جزء اكل من اول وصولة المزرعة والجزء الاخر اتاخر علفة الى 12 الى 24 ساعة وكانت النتيجة فى اليوم التانى كان الكتكوت اللى اكل على طول وزن جسمة زاد 5 جرام اكل علف 7 جرام نقص كيس المح او استهلك منة 4.25 جم وزن الامعاء زاد اصبح 1.4 جم فى حين ان الكتكوت اللى اتصوم نتايجة كانت وزن الجسم نقص 3.5 جم استهلك من كيس المح 3.78 جم وزن امعاءة قلت اصبحت 0.9 جم تعالو نشوف اليوم التالث مع الرابع اية اللى حصل مع ان الكتكوتين مع انهم خلاص اكلو **الكتكوت الى اكل على طول اكل علف 23.8 جم فى حين ان اللى اتصوم اكل 23.1 **وزن الكتكوت اللى اكل كان فى اخر الفترة دى زاد 17 جرام فى حين ان المتصوم زاد 15 جرام ** امتص الكتكوت اللى اكل 2.2 جم من المح فى حين ان المتصوم امتص فى اليوم دا 2 جرام ** وزن الامعاء كانت فى االى كل 2.2 جم وفى اللى اتصوم 1.9 جم تعالى بقى لاخر يوم اللى هو اخر اليوم الرابه ونهاية اليوم الخامس وزنا فكانت النتيجة ** الكتكوت اللى اكل استهلك علف 30.5 جم اما اللى اتصوم اكل 23.1 ** كان وزن الجسم اللى اكل علف 67.7 جم والمتصوم وزنة 57.7 جم ** وزن المح المتبقى 0.79 جم واللى اتصوم كان وزنة 1.36 جم ** وزن الامعاء فى اللى اكل 4.6 جم والمتصوم 3.8 جم من كل اللى فات دا هنقول لو عاوز استهلاك علف كويس اكل على طول لو عاوز وزن جسم اعلى اكل على طول لو عاوز استهلاك اسرع لكيس المح اكل على طول لو عاوز وزن امعاء اطول علشان تساعد فى الهضم والامتصاص اكل على طول اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم ----------------- اولا لازم نعرف ثوابت اللى هى كيس المح بيمتص بعد 78 ساعة اعلى من كدا بيكون فية خلل اما بسيط او كبير خلايا جدار الامعاء المعنية بالهضم واللمفات المناعية بيكتمل نموها فى اليوم السادس من العمر دول ثوابت لازم تكون عارفهم طيب الناس كلها بتعانى من نافق فى اول 3 ايام او حتى الاسبوع الاول كلة النافق دا 20% منة عدم امتصاص كيس المح دا بالنسبة لمحترفى التربية وباقى ال80% من النافق نسبة عالية ايضا منة عدوى كيس المح يعنى لم لم يمتص بسرعة فهيحصلة عزو ميكروبى خاصة بالسالمونييلا او الكولاى او الاستاف وهيعمل عدوى كيس المح كمان لو لم يمتص فى مدتة المحددة فانت هتحرم الطير من اهم مناعة لجسمة وهو مناعة امة لان المناعة الامية مصدرها كيس المح بكل المقدمة دى عرفنا اهمية ان كيس المح لازم يمتص بسرعة علشان المناعة وعلشان حاجة هنقولها فى اثناء كتابة البوست ===== زمان كان يسود اعتقاد ان حرمان الكتكوت من العلف او التجويع لمدة معينة بيساعد فى امتصاص كيس المح لكن اتضح العكس تمام ومع كثر الخبرة وكثرة التجارب والمقارنات الحقلية بنطلع كل فترة بمعلومة قد تكون جديدة مع المعلومات دى اولا )) التجويع فى فترة استقبال الكتكوت بياخر امتصاص كيس المح خد دى كمان عندك ان التجويع بياخر ايضا فى بناء جدار الامعاء اللى قلنا علية بتاع 6 ايام دا لان التجويع بيخلى الطير يستهلك دهون ورطوبة من الكيس على حساب البروتين ودا بياخر نمو جدار الامعاء بما فيها اللمفات المناعية المعوية وفى المرحلة دى اى تحصينة فى مية الشرب بتكون ضعيفة الكفاءة = كمان التعليف المستمر بيساعد فى كفاءة الهضم وحركة الامعاء والقنوات الهضمية وكل دا بيعجل من امتصاص المح بعكس التجويع =الطيور اللى اتجوعت كان وزنها اقل من الطيور اللى اكلت عن عمر 7 ايام واحنا عارفين اهمية وصول اعلى وزن فى العمر دا =الكلام دا ينظبق ايضا على تاخير الكتكوت فى المعمل دا اخطر من انى استقبلة واجوع على موضوع المناعة وكيس المح ووزن اليوم السابع = التجويع بيرفع معدل yolk /body weight ratio والمعدل دا بنعتبرة من اهم المعدلات اللى بنعرف بيها نتيجة شغل الاسبوع الاول كل ما كان رقمة كبير كل ما فشل فترة التحضين واتى بنتايج عكسية فى الوزن = طيب انا مش هجوع لاكن هعطى ذرة لوحدة مجروش هقولك انا كنت بعمل كدا بعد التخرج مباشرا فى التجارب بتاعتى وكان بيقلل معايا النافق لكن كان ايضا بيقلل معايا وزن اليوم السابع عارف لية؟؟ لان مستوى المثيونين والايسين هام جدا علشان امتصاص كيس المح ودا مش موجود فى الذرة لوحدة علشان كدا لما عملت تجربة واستقبلت على ذرة مع زيت صويا مع مثيومين ولايسين وعسل اسود واعشاب كان وزن اليوم السابع لم يتاثر يعنى اما تكون فاهم اية اللى ياخر امتصاص كيس المح وتتجنبة او تاكل علف بادى من اول وصول الكتكوت = معلومة قلنها قبل كدا التذبذبات فى حرارة التحصين بتاخر امتصاص المح يعنى ظبط حرارتك من 32 الى 34 على حسب السلالة = اهم معلومة اعمل اختبار حساسية علشان تعرف لو فية كولاى او سالمونييلا جاية من الام لان دول بياخر جدا امتصاصة المح -- ثق ان لو امتص المح فى موعدة اخذت كتكوت مناعيا جيد ووزن جيد تقدر يكمل معاك اخر امتصاص المح بيعمل عائق وثقل على الكتكوت ولانة محتوى على خيرات فسهل يكون مطمع لاى ميكروب بالتالى بيرفع النافق اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم ---------------------------------- هنقولها تانى ولكثرة الوقوع فى الخطا من قبل المربين وحتى من قبل المشرفين شكل الكبد اللى فى الصورة المرفقة دا طبيعى اول 48 ساعة من العمر وحتى لو قلب شوية على ماهجنى او عاجى او ابانوسى اى لون من دا يعتبر عادى يعنى لو داكن عن كدا كمان ودا سببة قلناة فى بوستات كيس المح ان المحتوى من الاحماض الدهنية لكيس المح اول ما بتمر بتمر على الكبد بالتالى بيتلون باالون دا وعلى حسب درجة اصفرار الكبد هى درجة امتصاص كيس المح هتقولى دا انا بشوفة فترة تعدى 5 او 6 ايام من عمر الكتكوت هقولك قلنا قبل كدا ان لما تكون الام كبيرة يعنى عمرها اعلى من 40 اسبوع بيزيد فترة اصفرار الكبد اللى ناتح من زيادة الاحماض الدهنية فى كيس المح لان الام بتكون نضجت وخيرها زاد فبتعطى الجنين خير اكثر من الاول خلاصة القول لا تنزعج من الشكل دا فى الكبد فى اول اسبوع طالما مفيش عندك اعراض مرضية او نافق يدل على مرض لان ناس كتير او ما بتشوف اللون الاصفر للكبد تعتقد انة سموم علفية وتهتم بوضع مضاد السموم على حساب باقى البرنامج فى الاسبوع الاول فى حين انك مهما حطيت من مضاد سموم وغيرة لون الكبد مش هيرجع لطبيعتة غير بعد الانتهاء من امتصاص كيس المح فلا ترهق جيبك كمربى ولا ترهق المربى يا حضرة المشرف ماديا راجع بوستات كيس المح وعددهم تقريبا 11 حتى تكتمل الصورة فى راسك اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم ---------------------------------------------------------- اتكلمنا كتير عن كيس المح تقريبا فى حوالى 13 بوست سابق وقولنا انة هو المسؤل الاول عن المناعة فى الاسبوع الاول من العمر خاصة المناعة الامية وقلنا انة يحمل خيرات من الام اذا قدر الكتكوت ان يتحصل عليها كلها فدى تعتبر اولى علامات نحاج فترة التحضين ووصول الوزن المستهدف فى الاسبوع الاول وقولنا قبل كدا ان افضل شغل ان الكيس يمتص تمام فى خلال 78 ساعة اكثر من كدا فيكون الوضع مش طبيعى فى البوست دا هنستعرض اسباب تاخير امتصاصة حتى نتجنبها وقبل ما نستعرض الاسباب دى احب اقول ازاى تعرف ان عندك تاخر فى امتصاص كيس المح او عدوى كيس المح قلنها قبل كدا فى بوست سابق تشريحيا لكن هنا هنقولها ظاهريا اولى واهم العلامات المميزة هى ريحة كريهة عفنة خارجة من بطن الكتكوت بنلاقى الزغب اللى على منطقة البطن ناعن اكثر من الازم بنلاقى بطن منتفخة مع سماكة فى جدارها بنلاقى منطقة السرة رطبة وغير ملتئمة كيس المح نفسة كلة خير طيب اعرف ازاى انة اصبح شر على الكتكوت فية مؤشر وعلامة مميزة للكلام دا وهى تحول لون الكيس من الاخضر المصفر اللزج شوية الى اصفر مائى سايب ولو اتحول الى بنى مائى كدا معناها اخطر مرحلة طيب التغير دا بيكون نتيجة 3 انواع من البكتيريا كولاى ودى اشهرهم استافيلوكوكاكس ودى عيب تطهير معمل وبروتس ودى خفيفة شوية يعنى لما كيس المح يتغير لونة وسماكتة تعرف ان الميكروبات دى هتملى جسمة وهتعمل تسمم ميكروبى علشان كدا معرف ان تاخر امتصاص كيس المح يعتبر هو اهم سبب لارتفاع النافق فى الاسبوع الاول وحتى لو فية سبب تانى فلازم يكون مشترك معاة عدوى كيس المح طبعا غاليية النافق اللى سببة كيس المح بيكون بعد اليوم الثالث قبلة بيكون كيس المح مرغوب ومحتوياتة نافعة وصالحة جدا ودى ملحوظة هامة حقليا نيجى لاهم حاجة اية اللى بياخر امتصاصة كيس المح اولا العدوى البكتيرية وخاصة الكولاى وبعدها السالمونييلا ثم السودوموناس وباقى انواع البكتيريا بس بنسبة اقل علشان كدا بنقول اعمل اختبار حساسية علشان تختار المضاد الحيوى اللى يقضى على الميكروبات دى مع بعض ومعنى ان حصل عندك نافق بسبب كيس المح بعد اليوم الثالث معناة ان اختيارك لادوية الاستقابل كان خاطئ ثانيا التجويع فى فترة التحضين او تاخير العلف بياخر من امتصاص كيس المح ومعروف ان تاخير العلف بيعمل تاخير فى نمو الامعاء تاخير العلف بيفقد كمية من الدهون المفيد فى المرحلة دى طبعا تاخير المية او عدم توزيع السقايات بحيث تكفى يعتبر كارثة اكبر من التاخير ودا موضوع محتاج نخصصلة بوست لوحدة بس يهمنا هنا تعرف ان من مصلحتك ان كل كتكوت يوصلة علف ومية خلال اول 12 الى 24 ساعة على اكبر تقدير ثالثا نوع العلف بمعنى تاكل اى حاجة غير بادى علشان يكون مرتفع البروتين لازم ياخر من امتصاص كيس المح وبالتحديد مستوى المثيونين والايسين هم لهم تاثير على تاخير الامتصاص رابعا حرارة التحضين لان تعرض الكتاكيت لاى انخفاض فى حرارة التحصين بياخر امتصاص كيس المح حتى التذبذب فى حرارة التحضين بردة بياخر يعنى تلاقى مكان حرارة كويسة فى الحضانة ومكان تانى كتاكيت متجمعة فية طبعا اى تعرض للبرودةبياثر لكن اكبر خطر على كيس المح لما بتكون الكتاكيت بردت منك اول 36 ساعة خامسا واخيرا تاخير الكتاكيت فى الهاتش دى هى وتاخير النقل او المسافة بين بين المعمل والمزرعة لهم دور فى تاخير الامتصاص طبعا فية اسباب تانية بس تاثيرها يكون يكون بسيط جدا مش محتاج نذكرة اسف جدا على اطالة البوست لكن انا حاولت اختصرة بقدر المستطاع لكن كل الى اتكتب دا مهم اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم -------------------------------------------------------- )تابع ...( |
| اعلانات |
|
||||||
احبتنا فى الله هل لو جايلك كتكوت عندة التهاب سرة او عدوى كيس المح وانت غالبية تحصيناتك بتكون فى الفترة الاولى من العمر سواء تحصيات ميتة او حية هل تعتقد ان التحصينات دى فعالة او عاملة تتر كويس او المناعة المرجوة منها ؟؟؟؟؟؟؟؟؟؟؟؟؟ يعنى الكل بيحصن عمر يوم او عمر 7 او بيحقن ميت قبل عمر 5 والغالبية بتحصن فى المعمل يعنى كمية التحصينات قبل اليوم التاسع تعتبر اكثر من نص تحصينات الدورة اولا اى كتكوت عندة التهاب سرة بالتالى بيتاخر عندة امتصاص كيس المح يعنى لا يستفيد من المناعة الموجودة فى الكيس بالاضافة الى فى حاجة فى الفسيولوجى اسمها نسبة كيس المح الى الجسم بتكون عبارة عن وزن كيس المح مقسوم على وزن الكتكوت والنتاج تضربة فى 100 ودا مؤشر بيقيسو علية حاجات كتير مش وقت سردها لكن المهم عندنا ان كل ما قلت النسبة او المعدل دا كل ما تميز الكتكوت بمناعة وصحة واداء جيد فى الفترة الاولى المعدل دا بيزيد فى الكتاكيت اللى عندها التهاب سرة واحد هيكون شاطر ومتابع البوستات القديمة يقولى يا عم دى مناعة امية وانا بصراحة مش عاوزها دا حتى انا بحصن جرعات اولى من التحصينات علشان اعادلها وبسلك الطريق للتحصينات التالية هقولك كويس واحد تانى فاهم بزيادة هيقولى المناعة الامية متهمنيش لان تحصيناتى بعيدة عن مجراها يعنى انا بحصن رش او تقطير هقولهم كلام كويس من ناس فاهمة يعنى حضرتك معتقد ان عدوى التهاب كيس المح او كتكوت جاى بالتهاب سرة وانت بتعمل الكلام دا مش هياثر على مناعة وتتر التحصينات هقولك غلطان لان كيس المح لما بيصاب بالكولاى ودا طبعا غالبية الحالات كدا بيقلل تتر جميع التحصينات الى ان يختفى كيس المح عند اليوم التاسع من العمر (( معروف ان الكتكوت الطبيعى الجيد بيختفى بعد 76 ساعة او تطول المدة شوية لو مفيش خبرة فى فترة الرعاية الاولى ) لكن فى حالة عدوى التهاب السرة بيمتد كيس المح الى قرب اليوم التاسع وممكن تزيد كمان وفية اكثر من تجربة لقياس تتر التحصينات وخاصة النيوكاسل كان بيوصل فى الكتكوت الطبيعى لوج 8.9 الى اليوم الخامس فى حين ان الكتكوت اللى فيى التهاب سرة لما بيتحصن نيوكاسل لا يتعدى ال 6.2 يعنى انخفاض فى المناعة ولو جينا نمشى مع الكتكوت المصاب معمليا نلاقية دايما اقل من الغير مصاب فى المناعة بكدا نفهم ان مش موضوع مناعة امية فقط لا دا كل التحصينات فى الفترة الاولى مناعتها ضعيفة طالما الكتكوت فية التهاب سرة وعلشان يكون الموضوع كامل هنقول اية اعراض التهاب السرة بيكون كتكوت خملان وفية عيومة مغمضة ولما بتمسكة بيفتح اسهال فتحة المجمع مرطبة باسهال اما بنى او ابيض وبطنة عالية شوية وعند التشريح هتلاقى زى الصور كدا هتلاقى كيس مح محتقن وهتلاقى كيس مح لونة مختلف عن الطبيعى هتلاقية كبير شوية مع ان المفروض يكون بيقل مع تقدم العمر طيب اية الاجراء السليم طبعا لما ان 90% من عدوى التهاب السرة او كيس المح بيكون نتيجتها اى كولاى فانا رائى الشخصى تعمل اختبار حساسية عند اقرب معمل ليك لان لو نصحتك بدوا معين ممكن يجيب نتيجة لان الميكروب حساس لة وممكن ميجبش نتيجة نظرا لسرعة مقاومة المرض لغالبية الادوية الافضل حساسية يعنى وانت بتفصح كتاكيتك فى اليوم الاول لقيت الاعراض دى اول حاجة تعملها اختبار حساسية وبعد ما تنزل الادوية اللى هينصحوك بيها ابدا برنامج التحصين غير كدا تاكد ان كل تحصينات قبل اليوم التاسع قليلة الفايدة او تترها اقل من المطلوب اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم -------------------------------------------- نصيحة لاخى المربى اى كتكوت يعدى علية 24 ساعة من وقت الفقس لا انصحك انك تستقبلة فمن المعروف ان مرور 24 ساعة على جسم الكتكوت من غير تحضضين او حرارة مناسبة بتفقد حوالى 48% من كيس المح اللى هو مليان بروتين ودهون وبالتالى تحويل اقل يعنى وزن اقل اخر الدورة كمان فقدان الكمية دى من كيس المح بدون تحضين بتاخر تكوين جدار الامعاء وبالتالى الهضم والامتصاص فى الفترة الاولى بتكون ملغية من حياة الكتكوت وصعب تعويض الفترة دى مرور 24 ساعة من غير تحضين بياخر تكوني كامل لفصوص الكلى ودا معناة نقرص مبكر او اسهال ابيض بيعمل تفاوت فى الاحجام او ما يسمى بالسردة مرور 24 ساعة على كيس المح وامتصاص الجزء الكبير دا منة من غير حرارة جيدة بيخلى المفقودة على من المناعة الامية الموروثة وبالتالى قلة او ضعف فى نتيجة التحصينات فى فترة التحضين دا نصيحة اهتم بيها علشان تعمل نتيجة كويسة طبعا حتى لو عملنا شغل خاص للكتاكيت اللى اتاخرت فى التحضين دى من محلول او عسل او غسول كلوى او خميرة دا دا بيقلل بس من المشكلة لاكن الفضل عدم استقبال كتكوت كدا لانها كدا كدا فلوس مدفوعة اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم -------------------------------------------- اطلالة سريعة عن ما يحدث بداخل الجهاز الهضمى فى اول 3 ايام من حياة الكتكوت لو تاخر العلف والمية نبداها بكيس المح اللى الناس بتاخر العلف علشان يمتص فى حين ان وزنة 6.8% من وزن الجسم بعد الفقس مباشرا (ملناش دعوة بحجم الكتكوت لان كلامنا نسبة مئوية للجسم) ولما تاخر المية والعلف كان نسبتة 6.2% من وزن الجسم يعنى الانخفاض فى امتصاص كيس المح مش ملموس لو اخرنا العلف او العلف والمية فى اول 24 ساعة لاكن عارف اية اللى حصل مع التاخير دا انخفاض فى وزن الكبد من 3,4% ( وزنة الطبيعى ) الى 3% لو تاخر العلف او المية اول 24 ساعة ودا معناة ان اهم عضو فى الجسم وزنة بيقل عن الطبيعى يعنى فلترة سموم اقل يعنى افراز انزيمات هاضمة اقل طيب هل الكبد بس اللى بيتاثر بتاخير العلف او المية دا اقولك لا تعالى نشوف باقى الاعضاء كتلة وزن القونصة من المعدى الغدية انخفضت من 7,2% من وزن الجسم فى حالة كتكوت واكل وشارب كويس الى 6,8% من وزن الجسم معنى كدا ان انزيمات هضمية لهضم البروتين اقل من الطبيعى لاحظ ان الكبد لما قل وزنة قلت معاة هضم الدهون والمعدة قلت معاها هضم البروتين يعنى فى المحصلة انخفاض فى الهضم وبالتالى انخاض فى الوزن فى اول الايام وباقى اجزاء الجهاز الهضمى هل تاثرت؟ اقولك ايوة الاثنى عشر ينخفض وزنة كم 1.9% الى 1,5% من وزن الجسم ودا انخفاض كبير حتى البنكرياس انخفض من 9,5% الى 8.8% من وزن الجسم وبردة الصائم والفائفى او ما يسمى jejunum, and ileum وزنهم انخفض بسبب تاخير العلف والمية ولو استعرضنا تاخير علف ومية كمان لليوم التانى او اليوم الثالث هنتفاجا بارقام صعبة عن انخفاض اوزان اجزاء الجهاز الهضمى عن الطبيعى بس الموضوع تفصلليا شرحة يطول لاكن هجيبلك كيس المح انخفض وزنة كم لما صومنا 48 ساعة بيكون المفروض وزنة 4,3% من وزن الجسم فى حين ان وزنة زاد مع التصويم الى 4,9% من وزن الجسم يعنى عكس ما كنا نتوقع تمام وطبعا دا لاسباب فسيولوجية يطول شرحها يعنى ما ينوب اللى يجوع او يعطش غير انخفاض كغاءة الجهاز الهضمى الكلام دا على مستوى وزن الاعضاء طيب على مستوى الجدار المبطن للجهاز الهضمى او ما يسمى الخملات لما بنصوم بيزيد عدد الخملات فى وحدة المساحة عن الطبيعى ودا بسبب ان مساحة العضو نفسة قلت بسبب قلة وزنة خلل فى انقسام الخلايا هل الزيادة دى مفيدة ؟؟؟؟؟؟؟؟؟؟ لا لانها زيادة من غير مصدر بروتين او طاقة فبتؤدى الى انتاج خلايا تموت بسرعة وعلى ما نيجى نعطى علف ونمد الخلايا دى بالبروتين والطاقة هتحتاج 4 الى 5 ايام على تستعيد نشاطها من جديد ودا اللى بيخلى طير اصغر من طير ودا بردة اللى بيعمل سردة اما وجود مصدر طاقة وبروتين متمثل فى العلف بيعمل زيادة فى طول الخملة نفسها ودا معروف انة بيوصل بالكتكوت لاعلى وزن فى الايام الاولى اللى هى متوقف عليها وزنة فى اخر الدورة على هامش استهلاك العلف بيقولك لو استقبلت الكتكوت على حرارة اعلى من 35 قل الامداد البروتينى والطاقة لخملات الامعاء زدا بردة بيقلل من خواص الخملة وخاصة فى طولها وعمقها يعنى عملية تطوير وبناء خملات جيدة محتاجة انقسام خلايا نشكل صحيح وهدم خلوى منظم ودا مش هيحصل الا فى وجود مصدر بروتينى وطاقى وكربوهيدراتى المحصل علية من العلف وفى حالة التصويم بيزداد الخلايا البلعمية الريزوزمية اللى بتتسبب فى موت خلايا الخملات ممكن تنتج خملات غير مكتملة الوظيفة بالتالى جدار امعاء صعيف التحويل والامتصاص والهضم اعتقد ما شرح مفصل لما بناخر العلف والمية بيحصل اية او حتى العلف بس طيب انا بعلف من اول يوم لية بيظهر عندى تفاوت فى الاوزان وسردة (( اللى سببها التربية ) لانك اول 48 ساعة بتسيب الطير اللى يقدر يوصل للمية والعلف يوصل وياكل واللى ميقدرش مش مهم سواء بتخفيض مساحة الحضانة او بقلة مساحة التعليف او بحرارة منحفظة تكون الكتاكيت على بعض المهم اى عائق يخلى الطير مياخدش كميتة من العلف والمية فى اول 48 ساعة من عمرة اسف جدا على اطالة البوست لان عارف ان ناس بتمل لاكن حبيت اغطى قدر الاستطاعة واللى مش عاجبة الاطالة يقول وانا اختصر فى البوستات القادمة اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم ---------------------------------------------- هل لعمر الام دور او تاثير بالنسبة لموضوع كيس المح دا ؟؟؟؟؟؟؟؟؟؟؟؟؟؟؟؟؟؟؟؟؟؟ سؤال هام وحيوى ويهم ناس كتير طيب الاجابة ؟؟؟؟؟؟؟؟؟؟؟؟؟ يجيب عليها الاخ Nirun Boonsinchai من جامعة اركنساس بيقولك لو الام تحت 40 اسبوع هتلاقى امتصاص كيس المح فى كتكوت التسمين اسرع لو اعلى من كدا بيكون ابطى شوية المعلومة دى تفيدنا جدا اولا بعدم الانزعاج من عدم امتصاص كيس المح لو الام كبيرة لو عرفنا انها كبيرة حاول الا يتلوث كيس المح او يحصل فية التهاب او عزو ميكروبى باختيار مضاد حيوى مناسب فى الاستقبال ( يعنى اعمل حساسية ) المعلومة دى بتوضح لية لما الام بتكون كبيرة بيكون نافق العمر الاول بيتسمر فترة اطول وكل ما تفتح النافق تلاقى كيس المح كبير طيب هل فية ملحوظة اخرى خاصة بعمر الام بالنسبة لكيس المح ؟؟؟؟؟؟؟؟؟؟؟؟؟ ايوة بيقولك كل ما كبرت الام يعنى نضج المبيض ونضجت خلاياة واصبح عندها خبرة توريث بيزيد محتوى الاحماض الدهنية من كيس المح والعكس فى العمر الاصغر بالنسبة للام طيب الخلايا الدهنية دى لها فوايد كتيرة جدا فى كيس المح عاوزة بوست مخصوص لاكن علشان يكون كلامنا حقلى ومفيد للمربى هقولك لا تتعجب ولا تتسرع لو لقيت الكبد مصفر فى الفترة الاولى خاصة فى الاعمار الكبيرة للام بمعنى ان الام الصغيرة فى العمر بيكون كتكوتها كبدة اصفر فترة قليلة لا تتعدى ال5 الى 6 ايام اما الكبيرة فبيكون اكثر من كدا بل يتعدى ال8 الى 9 ايام بسبب زيادة المحتوى من الاحماض الدهنية فى كيس المح فحضرتك اول ما تشوف المنظر دا متقول سموم او مشكلة فى الكبد وتعالج لا دا طبيعى اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم ----------------------------------------------------- فية اكثر من سبب بيرفع النافق فى الكتاكيت فى فترة الحضانة اتكلمنا عنهم فى بوستات سابقة لاكن باقى سببين المفروض لا نغفل عنهم هنحاول نسردهم باختصار السبب الاول زى ما فى الصورة (عدوى كيس المح) Yolk Sac Infection الكلام النظرى فيها كتير والكل عارفة لاكن احنا هنقول كلام حقلى فى عدة نقاط اولا اسبابة اما من تلوث فى مكن التفريخ او تفريخ بيض متسخ او تلوث فى المفقس غالبية الحالات المرصودة حقليا هى مسببها الكولاى ويلية الاستاف والاتنين سهل التغلب عليهم باى مضاد حيوى قوى مع انى من مشجعى المدرسة اللى بتقول اول ما تسمع كلمة كولاى بلاش اجتهاد فى اختيار المضاد الحيوى وسهل على نفسك واعمل اختبار حساسية فى اقرب معمل ليك هيوفر عليك كتير لانك لو نزلت دوا وطلع مفيش حساسية لية هتكون النتيجة ارتفاع النافق فى فترة التحضين جدا تاخر فى النمو بسبب تاخر فى اكتمال بطانة القناة الهضمية ( الخملات ) يعنى الطير مش هيوصل لعمر 7 ايام بوزن كويس بالتالى هيتاخر فى التحويل والوزن اخر الدورة ازاى تعرف حقليا ان دى عدوى كيس مح ومش سبب تانى ؟؟؟؟؟؟؟؟؟؟؟؟؟؟؟؟؟؟؟؟؟؟؟ ان النافق لو ريحة فاسدة كريهة جدا زى ريحة البيض الفاسد او بالبلدى كدا البيض الممشش ودا عرض مميز جدا هنعرض سبب اخر لارتفاع النافق خلال فترة التحضين ودا ناس كتير بتغفل عنة لاكن المربى او المشرف المحترف فقط اللى بيخلى بالة منة الا وهو الجوع دا بتلاقى كتاكيت غير مقبلة على الاكل فى اول 3 ايام وهى دى اللى بترفع النافق بعد اليوم الثالث من العمر والكل يعتقد انة منحنى السالمونييلا المعروف ولاكن العلاج مفيش منة فايدة الظاهرة دى محتاجة عين خبير ومراقب جيد للقطيع علشان يلاحظ الافراد اللى مش مقبلة على الاكل طيب الظاهرة دى اسبابها كتيرة جدا من حرارة ورطوبة غير مناسبة او ضعف فى مناعة الام وورثت للكتكوت الخمول والضعف ساعات تحضين غير جيد اوقات كتير اضاءة غير متجانسة مفيش عدد كافى من السقايات واطباق التحضين اسبابة كتير لاكن لو سبت الكتكوت كدا من غير تدخل هيرفع معاك النافق طيب اية الحل ؟؟؟؟؟؟؟؟؟؟؟؟ اولا رصد الحالة بدرى ثانيا تعرف اية الخلل اللى موجود فى الحضانة وتصلحة ثالثا خد الوصفة المجربة دى عملت معايا نتيجة فى الحالة دى بنسبة 90% اول 12 ساعة الكترولايت لو مش لاقية هات محلول معالجة الجفاف 1.5 جرام على اللتر وال12 ساعة الاخرى محلول الينسون اللى ذكرناة قبل كدا فى بوست سابق (( يارب تكون الناس فاكراة )) المحلول دا بيخلى الكتكوت اجبارى يستسيغ المية وبالتالى هيحرك الجهاز الهضمى وهيبدا ياكل على خفيف وبعد فترة هيرجع طبيعى طبعا مش هيكون زى زملائة لاكن اقل حاجة انة مش هيموت من الجوع فى اليوم الثالث اتمنى ان تكون الناس استفادت من البوست دا بالاضافة للبوستات السابقة نكون قفلنا كل مسببات النفوق فى فترة الحضانة اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم ---------------------------------------- هل فية علاقة بين كيس المح وشكل الكبد فى الفترة الاولى من حياة الطير او فى فترة التحضين وهل دا ياثر على التربية فى حاجة ؟؟؟؟؟؟؟؟؟؟؟؟؟ دى نقطة كنا قلناها على السريع فى احد البوستات واحنا بنتكلم على كيس المح البوست دا هنتكلم عنها بشئ من التوسع زى ما هو مبين من الصور 3 مزارع الثلاثة مشتركين فى ان كيس المح لا يتمص فى الفترة القياسية بتاعتة اللى هى 78 ساعة طيب اية اللى هيحصل للكبد لو كيس المح اتاخر فى الامتصاص بعض الحالات زى الصور بيكون شحوب فى الكبد او اصفرار ودا علشان الخلايا الدهنية اللى غنى بيها كيس المح وزى ما قلنا قبل كدا ان محتويات الكيس اول ما بتمر بيكون على الكبد فبيعمل الشكل الشاحب دا عارف الخطورة هنا فى اية ؟؟؟؟؟؟؟؟؟؟؟؟؟؟؟ فى ان بداية العمر يعنى فترة الحضانة 90%من الخلايا الدهنية للكبد جاية من كيس المح لو الكيس تم امتصاصة بصورة جيدة فى المدة الذمنية المقررة مش هيكون فية حمل دهنى على الكبد لاننا بعد الاسبوع الاول من العمر عاوزين كبد سليم خالى من اى حاجة تمثل عبئى علية علشان يشتغل مصفى جيدة للجسم خاصة ان فية ادوية وسموم علفية وخلافة لاكن لو فية امتصاص جيد للمح طبعا الخلايا الدهنية اللى رايحة للكبد عن طريقة هيتم تحويلها الى خلايا الجسم عن طريق الكبد بطريقة سهلة وبالتالى مش هيحصل نافق عالى وفى التشريح مش هيبان اصابة الكبد طيب فى حالات اخرى بيكون مصاحب لعدم امتصاص كيس المح التهاب سردة (90% من الحالات ) ودا معناة عزو بيكيترى سواء لسالمونييلا او كولاى ودا اللى بيخلى الكبد علية التنكرزات اللى فى الصورة دى وبيكون بردة سببها تاخير كيس المح فى الامتصاص طبعا فية حالات كتير وصورة اكثر لعلاقة كيس المح بشكل الكبد فى الاسبوع الاول من العمر وعلاقة دا برفع النافق فى الفترة الاولى وعارف القنبلة الموقوتة اية؟؟؟؟؟؟؟؟ظ انك تاكل علف عالى السموم فى حالة تاخير امتصاص كيس المح فى الحالة دى صعب الكبد يتحمل الضغط دا كلة ويزيد النافق جدا معاك فية فنيات كتير فى البوست كنت عاوز اكتبها بس انا عارف ان الناس مش بتحب البوستات الطويلة البوست دا مكمل للبوستات بتاعة كيس المح القديمة لو جمعتهم مع بعض هتطلع لجميع الفنيات عن الموضوع من الناحية الحقلية اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم -------------------------------------------------------------------- نظرا للكلام الكتير والاراء المختلفة حول موضوع كيس المح انا هكتب تجربتى معاة طبعا احنا جربنا اكثر من تجربة لاكن انا هتكتب انجح واحدة فيها وهى طبعا على حسب البعد عن مصدر المفرخ يعنى لو المفرخ بعيد هنعمل الاتى اولا الاستقبال على اى منتج فية الكتروللايت ولو مفيش خليها محلول معالجة الجفاف ولو معاة غسول كلوى يكون افضل او اى حاجة فيها ميثنامين مع سترات اما عن العلف ودا اهم حاجة اللى شغالين على علف جاهز الله يكون فى عونهم الى شغالين على علف متركب يبئى هنعمل الاتى اول 12 ساعة هنركب علفنا كالاتى ذرة صفرا تناسب كمية 12 ساعة يعنى 7 جرام لكل كتكوت اضاف الية 3%زيت صويا او زيت السمسم والاول افضل ومضاف الية 2% بريمكس تسمين (خليط من الفيتامينات والاملاح المعدينة الخاصة بالعلف) مضاف الية 3% خميرة الكلام دا لمدة 12 ساعة فقط واذا تبقى حاجة من الخلطة دى اخلطها على قدر وزنها علفك البادى العادى يعنى لو تبقى مثلا 100 ك حط معاهم 100 زيهم علف بادى وبعد كدا علف علفك العادى واهم اهم اهم اهم حاجة الابقاء على الحرارة 34 ثابتة او 3 ايام مهما كانت التوصيات ثم باقى الاسبوع 32 واستقبل على مضاد كويس للكولاى والسالمونيللا والميكوبلازما بالطريقة اللى فاتت دى بامر الله مفيش حاجة اسمها التهاب سرة كمان هيمعل معاك كتكوت مناعتة صح هيقدر يحول معاك كويس ويتقبل معاك التحصينات مع تحياتى اخوكم المهندس عاطف عبد الدايم -------------------------------------- اتكلمنا قبل كدا كتير عن كيس المح المرة دى عاوزين نشوف لة حل لان لوحظ ان 90 من نافق اول اسبوع بيكون عدم امتصاص كيس المح حتى لو فية سالمونيللا او كولاى او جفاف بيكون العامل المشترك فى النافق هو عدم امتصاص كيس المح وطبعا امتصاص الكيس دا لة فوايد كتير منها نقل المناعة الامية والجلوبيولينات المناعية من الام للكتكوت وبردة بيعتبر الاساس فى تكوين الجسم يعنى لو امتص الكيس فى الوقت المقرر لة اللى هو 76 ساعة تاكد ان الكتكوت دا هيحول كويس ويعمل معاك دورة كويسة طيب فية اكثر من حاجة بتسرع من امتصاصة ** اولها الاستقبال على مدرات البول او اى مركب فية هكسامين مع كربونات صوديوم لان اثبتت التجارب الحقلية ان المركب دا افضل حاجة تعمل تسريع فى امتصاصة لاكن انا شخصيا لا افضل الاستقبال على اى مدر بولى الا اذا كانت الكلية مصابة ** ثانيا ودا انا افضلة جدا لانة عمل نتايج كويسة الاستقبال على اى مادة سكرية حتى لو سكر عادى مع ان ناس كتير تقول دى طريقة قديمة الا ان كتير من التجارب الحقلية والعملية اثبتت ان الاستقابل على جرعة معينة من السكر للكتكوت فى اول ايامة خاصة اول 12 الى 16 ساعة بتعطى الطاقة لسحب كيس المح وبتعمل زيادة فى الحركة الدودية للامعاء والحركة دى بتشد الكيس للدخول الى التجويف المعوى وبالتالى سرعة امتصاص بفعل انزيمات الامعاء ** الطريقة الثالثة وهو الاستقبال على الحد الادنى من الحرارة يعنى مثلا السالات الثقيلة زى الكوب بتحتاج حرارة من 30 الى 32 فى الاستقبال يعنى فية حد ادنى اللى هو 30 وحد اعلى اللى هو 32 والسلالات الخفيفة زى الاربورايكرز والافيان الاستقبال على 33 الى 35 يعنى الادنى بتاعها 33 وكهذا يعنى اختار الحد الادنى المطلوب ودا بيسرع جدا من امتصاص كيس المح بحثا عن مصدر طاقة فى الجسم بس الطريقة دى انا مش بحبها لانها بتكوم الكتاكيت اول الايام وانا بحب دايما استقبل على الحد الاعلى من الحرارة ** الطريقة الرابعة الاستقبال على ذرة مطحونة مع بريمكيس فيتمينات واملاح معدنية بنسة 3% وبصراحة دى بتقل النافق جدا وبتسرع جدا من امتصاص كيس المح لاكن عيبها انها بتاخر الوزن عن نفس الكتاكيت الى استقبلناها على بادى عادى يعنى ممكن تعملها لو مش مهم عندك تاخير يومين فى الدورة ودا عن تجربة معاى فعلا اتمنى نكون استفدنا من الطرق دى وكل واحد يختار الطريقة اللى تناسب اسلوبة فى الرعاية بس المهم سرعة امتصاص الكيس علشان تقلل من النفوق فى العمر الصغير مع تحياتى وشكرا مهندس عاطف عبد الدايم -------------------------------------------------------------------- البوستات دى فى غاية الاهمية لمعرفة سلوك الطير فى اول اسبوع واهمية كيس المح وامتى يكون فية ضرر منة استوعبها جيدا هتفيدك كتير اللهم اجعل عملنا هذا خالص لوجهك الكريم مع تحياتى وشكرا مهندس عاطف عبد الدايم |
| اعلانات اضافية ( قم بتسجيل الدخول لاخفائها ) | |||
|
|
| إضافة رد |
|
| العلامات المرجعية |
| أدوات الموضوع | |
|
|
جميع الحقوق محفوظة 2017
|
