[ibraheem_alex]

السلام عليكم

عند قرايبي سخان غاز ٦ لتر أوليمبك كان مضايقهم مكانه من يوم ما ركبوه بتوع الغاز!

كل اللي عملته إني فكيته ونقلته من مكانه بدل ما هو شمال ماسورة الغاز خليته على يمينها من غير ما افتحه حتى .. كل اللي عملته إني فكيت وصلتين المياه وماسورة الغاز وبعدين نقلته عاليمين وثبتته وركبت الوصلات والماسورة تاني!!!

وبعدين بعد كدة مش راضي يشتغل خالص!! .. الإشعال الذاتي مش بيشتغل اصلا خالص مع إن الحديدة اللي بتفتح السويتش بتاع الإشعال بتتحرك مظبوط ومن غير اي مشاكل!!!

غيرت البطاريات واتأكدت من إن الاسلاك كلها متوصلة كويس وبرضه مفيش فايدة!!!!

أرجو المساعدة!

[lmouhib]

وعليكم السلام
اخي عليك بالاتصال باحد فني الشركة
ولا اعرف هل هناك تكوين او دورات لاصلاح السخانات لاشارك فيها ام لا ؟!

[ibraheem_alex]

انا شايف إن الموضوع لا يستحق إني اتصل بالشركة!!!!
أكيد الموضوع بسيط لأني معملتش أي حاجة في السخان وغير كدة بفهم في السخانات دي وغيرت جلدة الرداخ بنفسي قبل كدة لكذا سخان من غير أي مشاكل!!

لكن المرة دي واضح ان المشكلة في كهرباء الاشعال !

[ibraheem_alex]

تم حل المشكلة والحمد لله!

المشكلة طلعت أبسط مما تخيلت بكثير!

جبت أفوميتر وقمت بقياس فرق الجهد اللي طالع من علبة البطاريات فوجدته في حدود ١.٨ فولت فقط والمفترض أن يكون في حدود ٣ فولت لإنهم بطاريتين كل واحدة فيهم ١.٥ فولت...
المهم شلت البطاريات من العلبة وبصيت جوه العلبة فلقيت ان حديدة من حدايد التوصيل جوه العلبة فيها صدأ بسيط كان هو السبب مكنش بيخلي التوصيل مظبوط ...
المهم حكيت الصدأ بشيء حاد لحد ما شلته وركبت البطاريات من جديد واشتغل السخان والحمد لله!