السلام عليكم
بعد ان وقعت فريسة عملية نصب من شركة تدعي فيجن تليكوم vision telecom
احسست ان من واجبي تحذير الشباب من الوقوع في شراك مثل هؤلاء النصابين
بينما انا اتصفح اهرام الجمعة بحثا عن وظائف خالية مثل ملايين الشباب وجدت اعلان هذه الشركة (شركة اتصالات تريد شباب بدون خبرة )
قلت في عقل بالي شركات الاتصالات هي الا ماشية اليومين دول
رحت اقدم لقيت كلام مختلف مفاده اذا كنت عندي خبرة هشتغل ولو معنديش خبرة ممكن اتدرب عندهم الاول في العلاقات العامة او الكمبيوتر والصيانة
التدريب 50% مظهر ولباقة وسلوك وانضباط في مواعيد الكورس و50% استيعاب المادة العلمية وامتحان, وقالولي مش مطلوب منك اكتر من 50% عشان تشتغلي اما في شركتنا او في احد الشركات الا احنا وكلاء عنها بندرب لها موظفين
الادهى اني لازم ادفع 225 جنيه ترد لي اذا عديت ال 50% مع اول مرتب
قلت امري لله مفيش شغل بالساهل اليومين دول رغم اني عندي لغة وبعرف كمبيوتر لكن مش لاقية شغل خالص
خلصنا التدريب خلال شهر بعدين ادونا كلنا جوابات ترشيح نروح بيها فرع الموارد البشرية للشركة بعد اسبوعين من تاريخ انتهاء الكورس ورفضوا يقولولنا عن درجاتنا او اذا كنا هنشتغل او لا وكأنها اسرار حربية وسابونا اسبوعين في حالة قلق
عن نفسي كنت مظهري حلو والحمد لله و ملتزمة جدا في الكورس بالحضور والمواعيد والانضبط والسلوك ومذاكرة المادة العلمية والتفاعل مع المدربة وكنت بعمل presentation احسن من الغالبية
بصراحة كنت رايحة فرع الموارد البشرية وانا شبه متأكدة من قدراتي واني اكيد باذن الله هشتغل
اتفاجأت اني حتى محصلتش ال50% !!!!!!!!!!!!!!!!!!!!!
انا وواحدة تانية معايا البنت استغربت جدا ولقيتها بتدافع عني قدام الا بيعمل معانا انترفيو ,ربنا يكرمها, البجاحة بقى ان بعد ما سقطت وكمان راحت عليا ال225 جنيه الا دفعتها في الاول (حار ونار فيهم مش مسامحه)مطلوب مني ادفع 25 جنية رسوم شهادة اني اخدت كورس علاقات عامة عندهم
لما قريت الشهادة بتاعة بنت زميلتنا اشترتها لقيت الصيغة انها مش شهادة تدريب دي شهادة خبرة تفيد اني اشتغلت عندهم مدة شهر في العلاقات العامة
قلتله انا مش عيزة منكم شهادة ومش هدفع مليم زيادة دي حتى يا ريتها شهادة تدريب انا اصلا ماشتغلتش عندكو شهر يا كدابين
لا ومطلوب اذا اشتغلت ادفع 30 جنيه رسوم جواب ترشيح!!!!!!!!
الشركة دي بيتقدملها شباب كتير جداااااااااااا على امل انهم يتدربوا ويلاقوا شغل
وفي الحقيقة هما شوية نصابين وحرامية ومش بيشغلوا حد
فبل الانترفيو المعجزة ده قابلنا بنت زي القمر جية تاخد شهادتها وطلبت من السكرتيرة تدخل للمدير عشان تهزئه بقالها من شهر 4 بيوعدوها بشغل ولا حياة لمن تنادي
واخدت عندهم كورس علاقات عامة وبعتوها لشركة تشتغل في المبيعات ازاي معرفش!!!!!!!!!
اظرف حاجة ان الشركة اسمها vision telecom وملهاش اي دعوة بالاتصالات مرة يقولوا شركة تدريب ومرة صيانة ومرة اتصالات
ارجو من كل الشباب ان يحذروا من الشركة النصابة دي ومن امثالها
وارجو لكل من يقرأ موضوعي ان يخبر من لا يعلم حتى نتفادى جميعا النصب
انشروه في الايميلات والمنتديات للتحذير مع اخذ نية
انشره
انشره
انشره
شركه فيجن تيليكم للنصب والاحتيال
ربنا يجازيك خير
